UJENZI WA BOMBA LA GESI KUKAMILIKA MWEZI JUNI

Kazi ya ulazaji wa bomba la gesi chini ya bahari kutoka katika kisiwa cha Songo songo kupitia Somangafungu hadi Dar es salaam inatarajia kukamilika mwezi Juni mwaka huu.

Makatibu Wakuu na watendaji wa Wizara ya Nishati na Madini wakipanda kwenye meli katika kisiwa cha Songosongo walipokuwa kwenye ziara ya kukagua miradi ya gesi

Mbali na mradi  wa bomba la gesi kunufaisha nchi kuondokana na adha ya kukosa umeme wa uhakika pia ufungua fursa za ajira ikiwa ni pamoja na huduma za jamii kwa wakazi wanaoishi karibu na mradi huo.
Akizungumza na ujumbe wa makatibu wakuu ukiongozwa na Katibu Mkuu Kiongozi Balozi Ombeni Sefue Meneja Mradi wa Tanzania Natural Gas Transportation Pipeline Bw. Kapuulya Musomba aliuambia ujumbe huo kuwa bomba hilo lenye uwezo wa kuzalisha futi za ujazo milioni 140 linatarajiwa kukamilika mwezi ujao
Futi za ujazo milioni 140 zitaunganishwa na nyingine 210 zilizopo Somangafungu na kuongeza kuwa mradi utakapokamilika utakuwa na uwezo wa kuzalisha futi za ujazo milioni 750.
Naye Sultani Pwaga mtalamu kutoka Shirika la Maendeleo ya Petroli (TPDC) ambaye ni msimamizi wa mradi  alisema ujenzi wa kituo cha kusafisha gesi cha Madimba umeleta neeema kubwa kwa wakazi wa eneo la Madimba kwa kufungua fursa nyingi ikiwa  ni pamoja na ajira.
“Kwa mfano wakati wa ujenzi wa kituo hiki takribani vijana 350 waliajiriwa ambao wamekuwa wakinufaika na kipato kinachotokana na mradi huu.” Alilisitiza Bw. Pwaga.
Bw. Pwaga alisema  kuwa faida nyingine itakayopatikana ni pamoja na ajira 60 kwa wataalamu watakaofanya kazi katika kituo cha kusafisha gesi na kuongeza kuwa kipaumbele kitatolewa kwa wakazi wa Madimba.
Aliongeza kuwa wafanyakazi 30 watafanya kazi kwa siku 28 na kupumzika na wengine 30 kuendelea na kazi kwa siku 28 wengine wanapokuwa likizo kutokana na sababu za kimazingira.
Aidha Bw. Pwaga aliongeza kuwa kumejengwa nyumba za kuishi wafanyakazi zenye uwezo wa kubeba wafanyakazi 60 na wageni 26 na kusisitiza kuwa wafanyakazi wataishi kwenye nyumba zao kutokana na kwamba mitambo hiyo inaendeshwa kwa masaa 24 kwa siku saba.
Bw. Pwaga aliongeza kuwa  vyumba vingine 24 ni kwa ajili ya wageni mbalimbali wanaotembelea kituo hicho.
Akizungumzia muda wa kuwasili kwa mitambo hiyo Bw. Pwaga alisema  mitambo itawasili kabla ya mwezi Juni, 2014 na mradi  unatarajiwa kukamilika mapema Desemba mwaka huu.
Aliongeza kuwa mitambo hiyo kwa sasa inatengenezwa Ujerumani, Canada, Australia na China.

Imeandaliwa na:

Greyson Mwase,

Afisa Habari,

Wizara ya Nishati na Madini,

754/33 Mtaa wa Samora

S.L.P 2000 Dar es Salaam

Tel: +255-22-2121606/7, Fax: +255-22-2121606

Email:info@mem.go.tz

Tovuti: www.mem.go.tz