WAWEKEZAJI WAVUTIWA NA WAKALA WA JIOLOJIA TANZANIA

Wakala wa Jiolojia Tanzania (GST) umeshiriki vyema Maonesho na mkutano wa Kimataifa wa Madini maarufu kama Prospectors and Developers Association Convection (PDAC) yaliyofanyika Toronto Canada mnamo mwezi Machi mwaka huu na kuweza kuvutia wawekezaji wengi katika Sekta ya Madini.

Watendaji kutoka Wizara ya Nishati na Madini na GST wakiwa katika banda la Wakala wa Jiolojia Tanzania (GST), katika Maonesho na Mkutano wa Kimataifa wa Madini-Toronto Canada ili kuhakikisha kwamba taarifa sahihi za kijiolojia zinatolewa kwa wadau waliohudhuria Mkutano huo na hivyo kuvutia uwekezaji katika Sekta ya Madini.Katika picha: Kamishna wa Madini, Eng. Paul Masanja(wa kwanza kushoto), Mtendaji Mkuu wa GST, Prof. Abdulkarim Mruma (wa pili kutoka kulia), Eng. Assa Mwakilembe (wa pili kutoka kushoto) na Mjiofizikia, Raymond Pius (wa kwanza kulia).

Akielezea  ushiriki wa GST katika maonesho hayo, Mtendaji Mkuu wa Wakala wa Jiolojia Tanzania, Prof. Abdulkarim Mruma amesema kuwa Maonesho hayo yametumika kama njia mojawapo ya kusambaza  takwimu na taarifa za jiosayansi za kiwango bora kwa gharama stahili kwa  wadau nje ya nchi ili kuongeza ufahamu wa rasilimali za madini zinazopatikana Tanzania na  hivyo kuiwezesha sekta ya madini kuchangia ipasavyo katika ukuaji wa uchumi wa nchi.
“Hakuna mwekezaji yeyote duniani anayeweza kuwekeza katika sekta yeyote hususani ya madini bila kuwa na taarifa sahihi za upatikanaji wa madini, GST imeshiriki maonesho na mkutano huu kama njia ya kuwafahamisha wadau juu ya uwepo wa takwimu, taarifa na mazingira mazuri ya uwekezaji nchini Tanzania”. Alisema Profesa Mruma.
Mtendaji Mkuu wa GST alieleza kuwa, pamoja na taarifa  mbalimbali za jiosayansi zilizokuwa zikitolewa kwenye maonesho hayo, Wakala pia ulichukua fursa hiyo kuwafahamisha wadau walioshiriki mkutano na maonesho hayo juu ya uwepo wa taarifa mpya zilizotokana na utafiti wa jiofizikia wa kutumia ndege uliokamilika hivi karibuni na mwezi Januari mwaka huu.
Prof. Mruma aliongeza kuwa, GST kama mhamasishaji mkubwa wa uwekezaji Sekta ya Madini kwa kushirikiana na Wizara ya Nishati na Madini itaendelea kutekeleza kazi zake kwa weledi ili kuhakikisha taarifa za upatikanaji wa madini zinawafikia wadau kwa wakati.
Mtendaji Mkuu huyo alitoa wito kwa wadau wote wa ndani na nje ya nchi  kutumia taarifa na wataalam wa GST ili kuongeza ufanisi na tija katika shughuli zao za utafiti na uchimbaji wa madini.
Naye Kaimu Mkurugenzi wa Kazidata(Database) na Mratibu wa mradi wa SMMRP (GST), Bi Yorkbeth Myumbilwa aliongeza kuwa serikali kupita Wizara ya Nishati na Madini imeamua kwa dhati kuendeleza Sekta ya Madini nchini kwani  iliwekeza fedha  nyingi kwenye mradi  wa utafiti wa jiofizikia ili kubaini maeneo mapya yenye madini ili kuvutia wawekezaji wa ndani na nje ya nchi.
Bi Myumbila alitoa angalizo kuwa uwekezaji mkubwa katika mradi wa utafiti wa jiofizikia utakuwa hauna maana endapo taarifa na takwimu  zilizopatikana hazitawafikia wadau mbalimbali  hivyo ushiriki wa GST katika maonesho ya Canada ni utekelezaji wa  lengo la Serikali la kusambaza matokeo ya tafiti (taarifa za jiosayansi) kwa  wadau ili kuongeza uwekezaji  Sekta ya Madini.
Naye Afisa Biashara wa GST, Priscus Benard ameeleza kuwa Wakala wa Jiolojia Tanzania (GST) umepewa majukumu ya  kukusanya, kuchambua, kutafasiri, kuchapisha, kusambaza na kutunza takwimu na taarifa za kijiosayansi (jiolojia, jiokemia na jiofizikia) ambazo ni muhimu katika ufahamu wa kuwepo kwa madini mbalimbali nchini na njia bora za kutafuta na kuchenjua madini.
“GST inafanya uchunguzi wa kimaabara kwa sampuli za miamba, madini, mchanga, maji, mimea na udongo kwa ajili ya tafiti mbalimbali na kutoa huduma za kimaabara kwa  wadau wa ndani na nje ya nchi pamoja na kufanya utafiti wa uchenjuaji wa madini”.Alisema Bw Priscus.
Bw. Benard amesema kuwa matokeo ya tafiti huwekwa kwenye  ramani za kijiosayansi zinazoainisha kuwepo kwa aina ya miamba, madini na mazingira ya kijiosayansi (geoscientific environment) katika sehemu mbalimbali za nchi yetu na kuzisambaza taarifa na takwimu hizo kwa wadau ili ziweze kutumika katika sekta mbalimbali za uchumi. Pia matokeo ya tafiti huchapishwa kama vitabu, vijarida, na vipeperushi na kusambaza kwa wadau mbalimbali wa sekta ya madini na sekta nyingine.
Wakala wa Jiolojia pia umepewa jukumu la kuratibu majanga ya asili ya kijiolojia, matetemeko ya ardhi, milipuko ya volcano, maporomoko ya ardhi, mionzi asilia, kemikali zitokanazo na fukuto la volcano, mashimo ya asili ya kijiolojia) na kutoa ushauri wa namna bora ya kujikinga na/au kupunguza athari zake.