UKAWA WAKATAA MARIDHIANO

Mwenyekiti Mwenza wa Umoja wa Katiba ya Wananchi na Mjumbe wa Bunge la Katiba, Profesa Ibrahim Lipumba akisalimiana na wananchi kwenye Viwanja vya Kibanda Maiti Zanzibar jana, baada ya kuwasili Visiwani humo kwa ajili ya mkutano wa hadhara ambao haukufanyika baada ya Jeshi la Polisi kuzuia

Umoja wa Katiba ya Wananchi (Ukawa), umesema unachofanya sasa ni kuonana na wananchi ili kuwaeleza maovu yanayofanywa na Chama Cha Mapinduzi kwenye Bunge Maalumu la Katiba na kwamba hauna nafasi ya kufanya maridhiano na chama hicho.

Wakizungumza na wanahabari mjini Zanzibar jana, viongozi wa umoja huo walisema kuwa wataeleza namna CCM inavyopinga mawazo ya wananchi kwenye Bunge hilo, yaliyomo katika Rasimu ya Katiba iliyowasilishwa kwa mujibu wa sheria na aliyekuwa Mwenyekiti wa Tume ya Mabadiliko ya Katiba, Jaji Joseph Warioba.

Katika mkutano huo uliokuwa chini ya Mwenyekiti wake Profesa Ibrahim Lipumba kwa lengo la kuuelezea umma kuhusu uamuzi wao wa kutoka katika Bunge Maalumu la Katiba linaloendelea mjini Dodoma, umoja huo ulisema hauwezi kufanya maridhiano wakidai kuwa CCM siyo wakweli na wanafiki.

“Tunasikia kwamba juhudi zinafanywa ili kuwepo kwa maridhiano, lakini sisi hatuna nafasi hiyo, bali tunajiimarisha kuhamasisha wananchi kuhusu mawazo yao,” alisema Mwenyekiti wa Chadema, Freeman Mbowe ambaye pia ni kiongozi wa umoja huo.

Alifafanua kwamba mpango wao wa sasa ni kuonana na wananchi, lakini siyo kuzungumza na watu aliosema hawako tayari kutengeneza Katiba ya wananchi bali kwa masilahi ya chama chao.

Mbowe alisema kuwa wanaodai kuwa Ukawa wana mvurugano ni watu walioishiwa mawazo akiwataka wananchi wasiamini propaganda hizo.

 Kwa upande wake, Mwenyekiti wa NCCR –Mageuzi, James Mbatia alieleza kwamba kuna watu wanaopita na kutangaza kwamba ukipitishwa mfumo wa Muungano wa serikali tatu ni kuleta dola ya Kiislamu Zanzibar.

 “Hatuna haja hiyo, wasiitumie kudanganya umma kwa masilahi yao. Sisi tutawaeleza wananchi yote kuhusu fitina zao,” alisema Mbatia.

Katika hatua nyingine Mbowe amesema kuwa CCM inaeneza ubaguzi kwa kusema kuwa Wapemba wakifukuzwa Tanzania Bara, hawatakaa Unguja na kwamba jambo ambalo Ukawa inaliona siyo sahihi.

“Sisi hatutaki ubaguzi kwa sababu ni wamoja na Serikali tatu wananchi walizipendekeza wakiamini kwamba zitajenga Muungano ulio imara,” alisema Mbowe.

Umoja huo ulitoka nje ya vikao vya Bunge la Katiba kwa kile walichodai kuendelezwa ubaguzi na matusi katika mtiririko wa uchangiaji pamoja na kutosikilizwa kwa hoja za msingi zinazotolewa na walio wachache kwa manufaa ya taifa huku CCM iking’ang’ania hoja zake kwa masilahi binafsi.