TUCTA IFUATILIE AHADI YA RAIS KIKWETE

 

Rais Jakaya Kikwete

Katika maadhimisho ya Siku ya Wafanyakazi Duniani yaliyofanyika kitaifa jijini Dar es Salaam, Rais Jakaya Kikwete katika hotuba yake kwa Taifa alitoa ahadi kwa wafanyakazi katika maeneo mawili makubwa.

Kwanza aliahidi kuongeza mishahara ya wafanyakazi. Pili aliahidi kupunguza kodi inayokatwa kwenye mishahara hiyo kwa kiwango cha kuridhisha na kusema kwamba utekelezaji wa ahadi hizo utaanza katika Bajeti ya mwaka 2014/15 inayotarajiwa kuwasilishwa bungeni hivi karibuni.

Tamko hilo la Rais bila shaka litakuwa limepokewa na wafanyakazi wote kwa furaha isiyo kifani. Pamoja na ukweli kwamba Serikali imekuwa ikitoa ahadi nyingi kwa wafanyakazi na baadaye inashindwa kuzitekeleza, mara hii Rais ameonekana kuguswa binafsi na hali mbaya waliyonayo wafanyakazi na kuamua kuingilia kati pale alipoona kuna mivutano isiyokuwa ya lazima kati ya wizara mbili zinazohusika na masuala ya wafanyakazi.

Maelezo ya Rais Kikwete yanatoa picha kuwa, kumbe utekelezaji wa nyongeza za mishahara na upunguzaji wa kodi zinazokatwa katika mishahara hiyo limekuwa likikwamishwa na Wizara ya Fedha. Kwa maelezo yake mwenyewe, pamekuwapo na ubishi na mvutano mkubwa kati ya wizara za Fedha na Utumishi kuhusu viwango vya nyongeza za mishahara na punguzo la kodi kwenye mishahara hiyo kwa mwaka ujao wa fedha. Wakati Wizara ya Utumishi ilitaka viwango vya ongezeko la mishahara na punguzo la kodi viwe vya kuridhisha, Wizara ya Fedha, ikiungwa mkono na wafadhili ilitaka viwepo viwango vidogo vya ongezeko la mishahara na punguzo la kodi kwenye mishahara hiyo.

Kama siyo Rais Kikwete kuingilia kati na kuunga mkono msimamo wa Wizara ya Utumishi, wafanyakazi wangeendelea kusikia ngonjera na mashairi yaleyale ambayo wamekuwa wakiyasikia kutoka serikalini kwa miongo kadhaa sasa. Tunampongeza Rais kwa kusimama katika upande wa wavuja jasho na kutambua kwamba kuendelea kuwakamua hakuwezi kuleta tija. Kama alivyosema Rais, hata kama mapato ya Serikali ni madogo, lazima hicho kidogo kiendelee kutolewa kila mwaka ili kuleta unafuu kwa wafanyakazi.

Sisi tunadhani dhamira hiyo mpya ya Serikali ya kuanza kutimiza ahadi zake kwa wafanyakazi italeta uhusiano mzuri kati ya pande hizo mbili ambazo zimekuwa zikizozana na kuvuana nguo hadharani kutokana na kutoaminiana. Siyo siri kwamba uhusiano uliokuwapo kati ya pande hizo mbili ulikuwa wa kuviziana kama ulivyo wa panya na paka. Hata risala za wafanyakazi zilizosomwa kabla Rais hajatoa hotuba yake na kutoa ahadi tulizotaja hapo juu, zilitoa shutuma na maneno makali kwa Serikali kwa kutowajali wafanyakazi na kuwadhulumu haki zao.

Risala ya Shirikisho la Wafanyakazi Tanzania (Tucta), iliikumbusha Serikali kwamba kumlipa mfanyakazi mshahara unaokidhi mahitaji muhimu ya maisha siyo jambo la fadhila, bali ni mojawapo ya haki za msingi za binadamu. Risala iliyosomwa mkoani Mbeya iliitaka Serikali kuacha kuwanyonya wafanyakazi na pia kuacha kuwa mwajiri msumbufu kuliko wengine nchini.

Risala hizo na nyingine nyingi zilizotolewa na wafanyakazi wakati wa maadhimisho ya Siku ya Wafanyakazi Duniani zinapaswa kuifumbua macho Serikali ili itambue kwamba jumuiya ya wafanyakazi nchini siyo ya kupuuzwa. Itakuwa vyema iwapo Tucta itafuatilia utekelezaji wa ahadi hizo za Rais Kikwete kwa wafanyakazi ili ufunguliwe ukurasa mpya wa ushirikiano kati ya pande hizo mbili.