CHANGAMKIENI FURSA KATIKA SEKTA YA GESI - BALOZI SEFUE.

    Wananchi wa mkoa wa Mtwara wametakiwa kuchangamkia fursa zilizopo kutokana na kugundulika kwa kiasi kikubwa cha gesi katika mkoa huo kilichopelekea uwekezaji katika  viwanda ikiwa ni pamoja na kiwanda cha kusafisha gesi.

                         Katibu Mkuu Kiongozi Balozi Ombeni Sefue

Hayo yalisemwa na Katibu Mkuu Kiongozi Balozi Ombeni Sefue aliyekuwa katika ziara ya siku mbili katika mikoa ya Lindi na Mtwara kwa ajili ya kujionea maendeleo ya ujenzi wa  miundombinu ya bomba la gesi ikiwa ni pamoja na kiwanda cha kusafisha gesi cha Madimba na kiwanda cha simenti cha Dangote kilichopo Mtwara.
Katibu Mkuu kiongozi aliambatana na makatibu wakuu  kutoka wizara tofauti ikiwa ni pamoja na  Bw. Eliakim Maswi (Wizara ya Nishati na Madini) Dkt. Servacius Likwelile (Wizara ya Fedha na Uchumi) Bw. Job Masima (Wizara ya Ulinzi) Dkt. Shaban Mwinjaka (Wizara ya Uchukuzi)  Bw. Alphayo Kidata (Wizara ya Ardhi) na  Naibu Katibu Mkuu, Wizara ya Ujenzi Mhandisi Joseph Nyamhanga.
Wengine alioambatana nao ni Katibu Mtendaji (Mipango) Dkt. Philip Mpango, Kaimu Kamishna Mkuu kutoka Mamlaka ya Mapato Nchini (TRA) Bw. Rished Bade ikiwa ni pamoja na watendaji kutoka katika Wizara ya Nishati na Madini na taasisi zake.
Balozi  Sefue alisema kuwa umefika wakati wa wananchi kuchangamkia fursa hizo ili kujiletea maendeleo kwa vizazi  vilivyopo na vijavyo  bila kusahau sekta nyingine muhimu.
“ Nimefarijika sana na kasi ya ujenzi wa bomba la gesi ikiwa ni  pamoja na mikakati mkoa umejiwekea ya maendeleo lakini rai yangu ni kuwa, tusisahau sekta nyingine muhimu kwani gesi ni rasilimali inakwisha.’’ Alisema Balozi Sefue.
Balozi Sefue aliongeza kuwa  fedha inayopatikana na gesi inatakiwa kutumika ipasavyo kujenga uchumi kwa kufungua  vitega uchumi vingine vinavyoweza kuiwezesha Mtwara kuendeleza ukuaji wa uchumi wake hata mara baada ya gesi kwisha kabisa mbeleni.
“Inatakiwa ifikie vizazi vijavyo vijivunie na vitenga uchumi vilivyotokana na gesi iliyogunduliwa,  kwa maana nyingine gesi iwe imebadilisha historia ya Mtwara, naamini hivyo inawezekana kabisa iwapo rasilimali hii muhimu itasimamiwa ipasavyo. “ Alisisitiza Balozi Sefue.
Wakati huo huo akiwasilisha taarifa ya  maendeleo yaliyotokana na gesi  mkuu wa mkoa huo Mhe. Jospeh  Simbakalia alisema kuwa kutokana na ugunduzi wa gesi fursa nyingi zimeanza kuonekana katika mkoa huo.
Akitaja fursa hizo Bw. Simbakalia alisema ni pamoja na benki kuu ya Tanzania kufungua tawi lake katika mkoa huo, upanuzi wa bandari ikiwa ni pamoja na kujengwa kwa kiwanda cha simenti cha Dangotte.
Mhe. Simbakalia aliongeza kuwa zaidi ya ajira 300 zimetolewa  kwa vijana wanaoshiriki katika mradi wa ujenzi wa bomba la gesi  na kuongeza kuwa ifikapo mwaka 2025 mkoa wa Mtwara utakua  umepaa sana kiuchumi.
Akizungumzia changamoto zilizopo katika mkoa wake Mhe. Simbakalia aliongeza kuwa ni pamoja na kutokuwa na wataalamu wa kutosha kutoka mkoa wa Mtwara wanaoshiriki katika mradi wa bomba la gesi.
Hata hiyo Bw. Simbakalia alifafanua kuwa kutokana na changamoto hiyo wameanzisha shule mbili kwa ajili ya wanafunzi wa masomo ya sayansi na  hisabati ili kuzalisha wanafunzi watakaojiunga na  vyuo vikuu vilivyopo nchini ikiwa ni pamoja na nje ya  nchi kwa ajili ya kusomea masuala ya gesi na petroli.
“ Kwa mfano Wizara ya Nishati na Madini imekuwa ikitoa ufadhili kwa ajili ya wanafunzi wetu kusoma katika vyuo vikuu vilivyopo ndani na nje ya nchi , lakini changamoto kubwa inakuwa ni upatikanaji wa wanafunzi wenye sifa hizo  yaani waliofaulu  katika masomo ya hisabati na kiingereza, lakini tumejipanga kuzalisha wanafunzi wenye sifa hizo ili siku za usoni tupeleke wanafunzi wetu nje ya nchi na kujenga uchumi wa Mtwara.” Alisisitiza Mhe. Simbakalia.
Vilevile Mkuu wa Mkoa huyo alitaja changamoto nyingine kuwa ni pamoja na kutokuwa na teknolojia ya kisasa katika utafutaji na uchimbaji wa gesi ikiwa ni pamoja na vifaa vya kisasa.
Alisisitiza kuwa mradi wa gesi unahitaji uwekezaji mkuwa, kifedha, kiteknolojia na kitakwimu.

Imeandaliwa na:

Asteria V. Muhozya,

Afisa Habari,

Wizara ya Nishati na Madini,

754/33 Mtaa wa Samora

S.L.P 2000 Dar es Salaam

Tel: +255-22-2121606/7, Fax: +255-22-2121606

Email:info@mem.go.tz

Tovuti: www.mem.go.tz