KAPOMBE YUKO SAHIHI NA AZAM - MSOLA

 
        Shomari Kapombe (kulia) akiwa mazoezini na timu ya Azam, kushoto ni John Boko

Dar es Salaam Baada ya kuwapo kwa taarifa za uhakika za  beki Shomari Kapombe kujiunga Azam FC, kocha wa zamani wa Taifa Stars ametetea uamuzi wa mchezaji huyo kuwa amefanya uamuzi sahihi na muda mwafaka.

Kapombe anadaiwa kumalizana na Azam kwa ajili ya kuichezea msimu ujao wa Ligi Kuu na tayari ameanza kujifua na kikosi cha timu hiyo chenye maskani yake katika eneo la Chamazi lililoko pembezoni mwa Jiji la Dar es Salaam.

Kabla ya kuhamia Azam, Kapombe alikuwa anacheza soka ya kulipwa katika klabu ya AS Cannes ya  Ufaransa aliyojiunga nayo akitokea Simba SC kabla ya hivi karibuni kuamua  kuvunja mkataba.

Akizungumza na gazeti hili, Msola alisema  anaunga mkono uamuzi huo wa Kapombe kwa
vile anaamini Azam ni timu pekee inayoweza kuendeleza kipaji cha mchezaji huyo.

“Niseme wazi uamuzi wa Kapombe kujiunga na Azam ni sahihi kabisa ukizingatia kwa umri wake ndiyo timu ambayo anaweza akacheza bila presha za mashabiki na kufikia malengo yake.

“Nilimshauri aangalie maisha yake kwa sababu hizo timu mbili (Simba na Yanga) zina mambo mengi isitoshe hana elimu ya kutosha hivyo ni lazima awe makini kutumia kipaji chake ili baadaye asiye akajutia,” alisema Msola.

”Nimekuwa nikimpa ushauri kila wakati kama ambavyo amekuwa akipewa na Profesa Madundo Mtambo, hivyo nina uhakika anapita njia sahihi na atafanikiwa.”